26 декабрь көнө В.И. Ленин исемендәге балалар йорто тәрбиәләнеүсеһе, 1955 йылдан алып 1971 йылға тиклем БАССР-ҙың Мәғариф министры ФМ тыуыуына 100 йыл тулыуға арналған байрам кисәһе үтте. Кисәне асып, лицей-интернат директоры Илшат Марат улы Ҡәйепҡолов ФМ тыуған көнөнә арналған республика күләмендәге мөһим саралар менән таныштырҙы, арҙаҡлы шәхестең мәктәп-интернат тарихында тотҡан урыны тураһында һөйләне.
Байрам кисәһендә ФМ яҡшы белгән, уның менән аралашҡан ветеран-уҡытыусылар сығыш яһап, балаларҙы унан өлгө алырға, ҡуйған маҡсаттарына ынтылырға өндәнеләр. Лицеистар ФМ телмәренең яҙмаһын тыңланылар, уның аманатына тоғро булырға һүҙ бирҙеләр. Лицейҙың хор коллективы композитор Манвелян ижад иткән "Фатима" йырын башҡарҙы.
Тамаша залында ФМ тормошо һәм эшмәкәрлегенә арналған бай күргәҙмә ойошторолдо.